'கனவு நனவாகிறது' 2015

27 மே அன்று தொடக்கநிலை நான்காம் வகுப்புத் தமிழ் மாணவர்களான திரிஷா, நூர், யாஷிக்கா, பிரதோஷ், இப்ராஹிம், ஷஃபிக் ஆகியோர் ‘கனவு நனவாகிறது 2015’ என்ற போட்டியில் நம் பள்ளியைப் பிரதிநிதித்துப் பங்குபெற்றனர். இந்தப் போட்டியில் அவர்கள் ஒரு கடையை அமைத்து, எழுதுபொருட்களை விற்பதோடு அவர்களின் கடையைப் பற்றி அவர்கள் விளம்பரமும் செய்யவேண்டியிருந்தது. 

‘ஐ கடை’ என்று தங்கள் கடைக்குப் பெயர் சூட்டி, அவர்களின் கடையைப் பற்றி நம் பள்ளி மாணவர்கள் அபாரமாக விளம்பரம் செய்தார்கள். போட்டியின் இறுதியில், அவர்களுக்கு ஆறுதல் பரிசு கிட்டியது. அந்த ஆறு மாணவர்களுக்கும் எங்களின் மனமார்ந்த பாராட்டுகள்! 

போட்டியின் போது எடுக்கப்பட்ட சில புகைப்படங்கள் இதோ உங்கள் பார்வைக்கு: 

தொடக்கநிலை 4 தமிழ் முகாம் 2015

25 மே 2015 அன்று தொடக்கநிலை நான்காம் வகுப்பு மாணவர்களுக்குத் தமிழ் முகாம் ஒன்று ஏற்பாடு செய்யப்பட்டிருந்தது. அதில் மாணவர்கள் மொழி மற்றும கலச்சார நடவடிக்கைகளில் ஆர்வத்துடன் ஈடுபட்டு, பல புதிய வி‌ஷயங்களைக் கற்றுக்கொண்டார்கள். முகாமின் போது எடுக்கப்பட்ட சில புகைப்படங்கள் இதோ உங்கள் பார்வைக்கு:

கருத்துரைக்கலாம் வாங்க!

வணக்கம் மாணவர்களே!

இருவாரத் தமிழ்மொழிக் கொண்டாட்டங்களின் போது, நீங்கள் பங்குபெற்ற ஐ-திரை பயிலரங்கு பற்றி உங்கள் கருத்துகளை இங்கு நீங்கள் தெரிவிக்கலாம். 

செய்தி எழுதுவது எப்படி?

அன்பார்ந்த தொடக்கநிலை ஐந்தாம் வகுப்பு மாணவர்களே,

சென்ற வாரம் செய்தி எழுதுதல் பற்றிய பாடம் வகுப்பில் நடத்தப்பட்டது. அந்தப் பாடத்தைக் குறித்த உங்கள் பிரதிபலிப்புகளை இங்குப் பதிவு செய்யுங்கள்! 

சொற்போர் 2015 தேர்வுச்சுற்று

07/02/2015 (சனிக்கிழமை) அன்று சொற்போர் 2015 விவாதப்போட்டியின் முதல் தேர்வுச்சுற்று தொடங்கியது. அத்தேர்வுச்சுற்றில் நம் பள்ளியைச் சேர்ந்த மாணவர்களும் கலந்துகொண்டனர். 

ரியாஸ் (6S), ஃபைரோசா (6R), தேவ்ராஜ் (6S)
ராம்குமார் (5S), கிருபன் (5S)

‘இன்றைய பெற்றோர்கள் ‘காக்கைக்கும் தன் குஞ்சு பொன் குஞ்சு’ எனும் மனப்போக்கில் பிள்ளைகளுக்கு அதிக செல்லம் கொடுக்கின்றனர்’ என்ற தலைப்பை நம் பள்ளி மாணவர்கள் ஒட்டிப் பேசினார்கள். 

நம் பள்ளி மாணவி, ஃபைரோசா (6R) தேர்வுச்சுற்றில் சிறந்த பேச்சாளராகத் தேர்வு செய்யப்பட்டார். அவருக்கு எங்களின் மனமார்ந்த வாழ்த்துகள்!

2015 வருக! வருக!

புதிய ஆண்டு பிறந்துவிட்டது!
உங்கள் கனவுகள் அனைத்தும் நனவாக்கும் முயற்சியில் நீங்கள் ஈடுபடும் நேரமும் தொடங்கிவிட்டது.
இவ்வாண்டு உங்கள் அனைவருக்கும் சிறப்பான ஒரு கல்வி ஆண்டாக அமைய எங்களின் நல்வாழ்த்துக்கள்!

ஆசிரியரின் வாழ்த்து

தீபாவளிக் கொண்டாட்டம் 2014

தீபாவளிப் பண்டிகையை முன்னிட்டு, 21/10/2014 அன்று நம் பள்ளியில் தீபாவளிக் கலைநிகழ்ச்சி நடைபெற்றது. அந்த நிகழ்ச்சியின்போது நம் தமிழ் மாணவர்களால் பலதரப்பட்ட அங்கங்கள் சிறப்பாகப் படைக்கப்பட்டன. ஆடல், பாடல் என்று மாணவர்களின் குதூகலமான படைப்புகள் அனைவரையும் தாளம் போட வைத்தன. அந்தப் படைப்புகளுடன் தீபாவளி பற்றிய சில முக்கியத் தகவல்களும் கலைநிகழ்ச்சியின் போது அனைத்து மாணவர்களுக்கும் விளக்கப்பட்டன.

கலைநிகழ்ச்சியின் சிறப்பு அம்சமாக ஆசிரியர்கள் படைத்த ‘பங்கரா’ இந்திய நடனம் அமைந்தது. அது அனைவரையும் வெகுவாக கவர்ந்தது. அதனைத் தொடர்ந்து அனைத்து மாணவர்களும் ஆசிரியர்களும் அந்த நடனத்தின் ஒரு சில அசைவுகளைக் கற்றுக்கொண்டதோடு, அவர்கள் அனைவரும் ஒன்று சேர்ந்தும் ஆடி மகிழ்ந்தார்கள்.

இவ்வாண்டு தீபாவளிக் கலைநிகழ்ச்சி அனைவருக்கும் ஒரு மறக்க முடியாத கலைநிகழ்ச்சியாக அமைந்தது எனலாம். நிகழ்ச்சியில் இடம்பெற்ற சில சிறப்பு அம்சங்களைச் சித்திரிக்கும் புகைப்படங்கள் இதில் இணைக்கப்பட்டுள்ளன. கண்டு மகிழுங்கள்!

 

 

 

 



நல்லாசிரியர் 2014

தமிழாசிரியர்களைப் போற்றிக் கௌரவிக்கும் வகையில் 12வது ஆண்டாகத் தமிழ் முரசு நாளிதழ் செப்டம்பர் ஆறாம் தேதி அன்று நல்லாசிரியர் விருது 2014 நிகழ்ச்சியை ஏற்பாடு செய்து இருந்தது. சிங்கப்பூர் தமிழாசிரியர் சங்கம், கல்வி அமைச்சு ஆதரவுடன் ஆண்டுதோறும் நடக்கும் இந்நிகழ்ச்சியில் கல்வித் துணை அமைச்சர் சிம் ஆன் சிறப்பு விருந்தினராகக் கலந்துகொண்டு விருதுகளை வழங்கினார். உமறுப் புலவர் தமிழ் மொழி நிலையத்தில் நடந்த இவ்விருது வழங்கும் நிகழ்ச்சியில் தொடக்க நிலை, உயர்நிலைப் பிரிவுகளில் மொத்தம் எட்டு ஆசிரியர்களுக்கு விருதுகள் வழங்கப்பட்டன.

அதில் தொடக்கநிலை பிரிவில் நம் பள்ளியின் தமிழாசிரியரான திரு.மோகன் சுப்பையா வெற்றி வாகை சூடினார். அவருக்கு எங்கள் மனமார்ந்த நல்வாழ்த்துகள்! 

      http://www.tamilmurasu.com.sg/story/41358



 

 

தாய்மொழி மாணவர்க்கூட்டம் 29/08/2014

29 ஆகஸ்ட் 2014 அன்று இவ்வாண்டின் இரண்டாம் தாய்மொழிகளுக்கான காலை மாணவர்க்கூட்டம் (Morning Assembly) இடம்பெற்றது. தமிழ் மாணவர்கள் அனைவரும் வழக்கம்போல் அன்று காலை நடன அறைக்கு அழைத்துச் செல்லப்பட்டார்கள். 

அங்கு, தொடக்கநிலை நான்காம் வகுப்பு மாணவர்கள் சிலர் பங்குபெற்ற என் கனவுக்கடை போட்டியில் இடம்பெற்ற ஒரு சில அங்கங்களும் படைப்புகளும் ஒளிப்பரப்பப்பட்டன. அதன் பிறகு, 'ஒரு நிமிடத்திறன்' அங்கத்தில் பங்குபெற்ற தங்கள் சக மாணவர்களின் படைப்புகளை அனைவரும் கண்டு மகிழ்ந்தார்கள். பங்கெடுத்த மாணவர்களுக்கு ஆரவாரமும் உற்சாகமும் கொடுத்த அதே வேளையில், அவர்களும் எப்படி இந்த அங்கத்தில் பங்குபெறலாம் என்பதைப் பற்றிய தகவல்களும் அன்று அவர்களுக்கு வழங்கப்பட்டன. 

விரைவிலேயே இன்னும் கூடுதலான மாணவர்களின் படைப்புகளையும் திறன்களையும் இந்த வலைப்பூவில் நீங்கள் எதிர்பார்க்கலாம்.